Ramiz Məmmədov -İlahi bir möcüzə ANA SÜDÜ

      Share

      Tibbi baxımdan ana südü körpə üçün ən xeyirli qida sayılır.

       Onun tərkibində körpənin sağlam inkişafı üçün tələb olunan bütün faydalı maddələr vardır. Burada maraq doğuran bir məqam var ki, o da ana südündə körpə üçün lazım olan maddələrin  uşağın keçirdiyi mərhələlərdən asılı olaraq dəyişməsidir. Belə ki, uşağın böyüməsinə paralel olaraq hansı qidalara ehtiyac varsa, südün tərkibi ona görə formalaşır.  Yeni doğulan körpənin gəldiyi bu yeni həyata uyğunlaşması asan olmur. Bu dövrdə  körpəyə zərər verəcək mikroblardan qorumaq üçün onun immunitet sistemini gücləndirmək tələb olunur. İmmunitetin ilkin gücləndirilməsi də məhz ilk ana südü ilə olur. Çünki körpə doğulan kimi anadan gələn ilk ana südünün tərkibi uşağın immunitetini gücləndirən zülal, leykosit və anticisim baxımından çox zəngin olur. Bu maddələr eyni zamanda onun həzm sisteminin inkişafına da köməklik edir. 

                  Daha sonra süd durularaq körpənin susuzluğunu yatıracaq hala gəlir. Sonrakı mərhələlərdə isə, uşaq böyüdükcə onun aclığını aradan qaldırmaq üçün süd get-gedə qatılaşmağa başlayır.

                  Erkən doğulan körpənin ehtiyacına görə südün yağlılıq nisbəti daha çox olur. Həmin vaxt südün tərkibi zülal, natrium, xlor və dəmir baxımından daha zəngin olur. Bunlar da erkən doğulan körpənin sağlamlığına xidmət edən maddələrdir.

      Bunlara əlavə olaraq, uşağın cinsiyyətinə görə də südün tərkibinin fərqli olması diqqətimizi cəlb edən başqa bir məqamdır. Bu da onu göstərir ki, ana südü sadəcə uşağın fiziki baxımdan sağlam böyüməsinə deyil, eyni zamanda onun cinsiyyətinə bağlı davranışlarına da birbaşa təsir edən ən mühüm amildir.

      Allah-Təala körpənin sağlam inkişafı üçün tərkibi lazımi qədər maddələrlə zəngin olan ana südünü bizlərə bəxş etmişdir;  bununla kifayətlənməyib ana südünü neçə il uşağa verməli olduğumuzu da Qurani-Kərimdə belə bəyan etmişdir: “Əmizdirməni tamamlamaq istəyən analar övladlarını tam iki il əmizdirməlidirlər…” (əl-Bəqərə, 233). Yenə başqa bir ayədə Allah-Təala belə buyurur: “Biz insana ata-anasının qayğısına qalmağı əmr etdik. Anası onu gündən-günə zəiflədiyinə (çəkdiyi əziyyətlərə) baxmayaraq (bətnində) daşımışdır. Onun süddən kəsilməsi isə iki il ərzində olur. Mənə və valideynlərinə şükür et! Axır dönüş Mənədir”. (Loğman, 14)

       Ayələrdə Allah-Təala  ana südünü körpəyə iki il müddətində verməyi tövsiyə edir. Bu gün aparılan elmi tədqiqatlar ana südünün uşağa olan faydasının və ya uşağın ana südünə olan tələbatının müddətinin, həqiqətən, iki il olduğunu bildirir. Həmçinin Ümumdünya Səhiyyə Təşkilatı da uşağı iki yaşına qədər ana südü ilə qidalandırmağı təkidlə tövsiyə edir.

      Müasir elm ana südünü körpəyə iki il müddətində verməyin vacibliyini 21-ci əsrdə kəşf etdiyi halda, Qurani-Kərim bu həqiqəti 1400 il bundan əvvəl bildirmişdi. 

      • Hits: 422 clicks

      Tecox component by www.teglo.info