İRFANDAN

          Əziz oxucu!
         Bu isti yay günlərində İrfan jurnalının heyəti adından sizi salamlayırıq. Günlər həftələri, həftələr ayları, aylar illəri qovaraq yeni bir Ramazanın astanasına gəldik. On bir ayın sultanı dediyimiz, xüsusi coşquyla qarşılamaq üçün bütün varlığımızla sevinərək hazırlaşdığımız mübarək bir ay. İnsanlığın xilas yolunu göstərən müqəddəs kitabımız Qurani-Kərimin nazil olduğu, ilahi lütf və bərəkətin aram-aram yağdığı bir ay. Artıq məğfirət ayının gəlişini müjdələyən Rəcəb və Şabanı geridə qoyduq. Ramazana giririk. İftarları, sahur və Quran qiraəti ilə mənəvi ab-havanın hakim olduğu mübarək bir ay. Bir ay uzunu necə olmalıyıq, nələrə diqqət etməliyik, bu ayın mahiyyəti nədən ibarətdir? Bütün bunlara jurnalımızın səhifələrində cavab tapacaqsınız. Oruc ayının gəlişini nəzərə alaraq bu sayımızı sizlər üçün Ramazana həsr etdik.
         Bu sayımızda “Ömrün Ramazan dayanacağı” adlı məqalədə hər birimizin yalnız bir dəfə yaşadığı həyatda dəfələrlə qarşılaşdığımız Ramazan fürsətini oxuyacaqsınız. “Əxlaqi təkamül ayı” başlıqlı yazıda Ramazanın insanı necə yetişdirdiyi haqda oxuyacaqsınız. “Ramazan mühaciri olmaq”, “Bu ay sizə qonaq gəldik” məqalələri hər biri içində olduğumuz ayın müxtəlif xüsuslarına diqqət çəkir. Həmçinin İrfan kollektivi adından jurnalımızda xüsusi səhifələr ayıraraq “Məğfirət iqlimi Ramazan və oruc” başlıqlı bir yazı yayımladıq ki, bu yazıda da Ramazan və oruc fəlsəfəsinin nə olduğunu bir daha görəcəksiniz. “Həzrət Peyğəmbərin Ramazan həyatı”nı oxuyaraq oruclarımızı onun orucuna bənzətməli, Ramazanı onun dediyi kimi keçirməliyik ki, “İmanlı könüllərə müjdə” ayı olan Ramazan bu il bizim üçün sözün həqiqi mənasında bir müjdəyə çevrilsin və cənnətdən xəbər versin. Jurnalımız həmişəki kimi bir-birindən maraqlı mövzularla zəngindir. Bu baxımdan “Mənəvi kimliyimiz”, “Acıdərənin suyu”, “Cavabsız suallar”, “Hz. Peyğəmbərin aləmlərə rəhmət oluşu”, “Şeytana və nəfsə uymamaq” adlı məqalələr sevə-sevə oxuyacağınız yazılar qəbilindəndir. Möhtərəm müəllifin qələmə aldığı “Salehlərlə bərabərlikdə təbərrük üfüqü” yazısı isə hər birmizin önündə yeni üfüqlər açaraq bizə qaranlıq qalan bəzi məslələrdə yolumuzu aydınladacaqdır. Digər tərəfdən sizdən gələn yazı və şeirlərin də jurnalımızda çap edildiyini görəndə sevinəcəyinizi indidən təxmin edirik. Bir neçə ay bundan əvvəl jurnalımıza Nübar İsazadə tərəfindən göndərilən “Peyğəmbər sevgisi” məqaləsinin, Ramin Mahmudovun və Vaqif Nurinin şeirlərinin nəşr olunması müəllifləri sevindirəcəyini düşünürük.
         Əziz oxucu!
         Həmçinin oxuma və maariflənmə ayı olan Ramazan ayında sizi oxumağa, araşdırmağa, faydalı hobbilərlə məşğuliyyətə səsləyirik. Yaşadığımız bu mübarək ay müsbət mənada yeni vərdişlərin əldə edildiyi aydır.
         Elə isə haydı yaxşı vərdişlər qazanmağa. İrfan jurnalı bütün Azərbaycan xalqını Ramazan ayının gəlişi münasibəti ilə təbrik edir!

 

ÖMRÜN RAMAZAN DAYANACAĞI Nurlan MƏMMƏDZADƏ Salehlərlə bərabərlikdə TƏBƏRRÜK üfüqü Osman Nuri TOPBAŞ ORUC AYI Sedat DEMİR